Matthew 15

Farisi naŋgi Qotei aqa anjam gotraŋyoqnsibqa olo naŋgo segi moma naŋgo dal anjam dauryoqneb

1Onaqa bati deqa Farisi naŋgi ti dal anjam qalie tamo qudei ti naŋgi Jerusalem dena bosibqa Yesus aqa areq di koroeb. Koroosib minjeb, 2“Ino aŋgro naŋgi kiyaqa gago moma naŋgo dal anjam gotraŋyeqnub? Agi naŋgi iŋgi uyqa oqnsib mati baŋ yansosaisosib laŋa uyeqnub.”

3Onaqa Yesus na kamba minjrej, “Niŋgi kiyaqa Qotei aqa dal anjam gotraŋyoqnsibqa olo nuŋgo segi kumbra dauryeqnub? 4Qotei a nami marej, ‘Ni ino ai wo abu wo naŋgo sorgomq di geregere sosimqa naŋgo anjam dauryoqne. Tamo bei na aqa ai wo abu wo naŋgi misiliŋnjrimqa a qalib moiem.’ Qotei a nami degsi marej. 5Ariya niŋgi mareqnub, ‘Tamo bei aqa ai kio aqa abu kio iŋgi qa truquamqa a na minjqas, “Ijo iŋgi iŋgi ejunum endi e ni emqa kere. Eo. E ni emqasai. E nami Qotei atraiyqa giltem deqa e ni aqaryaimqasai.” ’ 6A degsi minjqas di niŋgi marqab, ‘A keretqo. A na aqa ai wo abu wo naŋgi aqaryainjraiq.’ Niŋgi degsib marqab. Nuŋgo kumbra dena niŋgi Qotei aqa anjam gotraŋyoqnsibqa olo nuŋgo segi moma naŋgo kumbra soqteqnub.

7“Niŋgi gisaŋ tamo. Agi Qotei aqa medabu o qaji tamo Aisaia a nami niŋgi qa keretsiqa anjam endegsi marej, 8‘Tamo naŋgi di naŋgo medabu na ijo ñam soqteqnub. Ariya naŋgo are miligi e qa sosai. Naŋgo areqalo isaq di unu. 9Naŋgi mandam tamo naŋgo dal anjam palontoqnsib olo beltoqnsib mareqnub, “Gago anjam endi Qotei aqa anjam.” Deqa naŋgi laŋa babaŋ na e qa loueqnub.’”

Kumbra kie na tamo jiga yeqnu?

10Yesus a Farisi naŋgi anjam degsi minjrsiqa olo tamo uŋgasari kalil naŋgi metnjrnaqa aqa areq bonabqa minjrej, “Niŋgi ijo anjam endi qusib geregere are qaliye. 11Tamo bei a iŋgi uyimqa aqa miligiq aiqas dena tamo jiga yqasai. Anjam kalil tamo aqa miligiq na oqsiq medabuq na branteqnu qaji dena tamo jiga yeqnu.”

12Yesus a na tamo uŋgasari naŋgi anjam degsi minjrsiq koboonaqa aqa aŋgro naŋgi aqa areq bosib minjeb, “Farisi naŋgi ino anjam di qusib ni qa are ugeinjrqo. Di ni qalie e?”

13Onaqa Yesus na minjrej, “Ijo Abu laŋ qureq di unu qaji a iŋgi wau ejunu. Ŋam kalil a yagosai qaji di a na jirim qoji otorosim taqal breinjrqas. 14Deqa niŋgi Farisi naŋgi qa are koba qalaib. Naŋgi tamo ŋam qandimo bul. Deqa naŋgi na tamo naŋgi gam osornjrqa keresai. Tamo ŋam qandimo bei na tamo ŋam qandimo bei aqa baŋ ojsim ombla walwelqab ombla maŋgalsib subq aiqab.”

15Onaqa Pita na Yesus minjej, “O Tamo Koba, iŋgi jiga qa yawo anjam maronum di aqa utru geregere plaltosim mergim iga quqwom.” 16Onaqa Yesus na kamba aqa aŋgro naŋgi endegsi minjrej, “Niŋgi dego ijo yawo anjam di aqa utru poiŋgosai unu e? 17Tamo naŋgi iŋgi uyeqnabqa aisiq meneq di unu. Meneq dena bi talq di waiyeqnub. Niŋgi di poiŋgosai kio? 18Ariya iŋgi iŋgi kalil tamo naŋgo are miligiq na oqoqnsiq medabuq na branteqnu qaji dena tamo jiga yeqnu. 19Iŋgi iŋgi tamo naŋgo are miligiq na branteqnu qaji agi ubtsiy merŋgwai. Areqalo uge uge, tamo qaloqa, uŋa qa laoqa, was aqa ŋauŋ anjamyoqa, bajiŋoqa, was aqa jejamu laŋa gisaŋyoqa, was yomuiyoqa. 20Kumbra uge uge deqaji tamo naŋgo are miligiq na brantoqnsiq dena tamo jiga yeqnu. Ariya tamo naŋgi baŋ yansosaisosib laŋa iŋgi uyqab dena naŋgi jiga yqasai.”

Kenan qaji uŋa a Yesus qa aqa areqalo tulaŋ siŋgilatej deqa Yesus na aqa aŋgro boletej

21Onaqa Yesus a sawa di uratosiqa walwelosiq Tair qure ti Saidon qure ti naŋgo sawaq gilej. 22Gilsiq di sonaqa Kenan qaji uŋa bei a sawa dia soqnej. Sosiqa a Yesus aqa areq bosiqa siŋgila na pailyosiq minjej, “O Tamo Koba, Devit aqa Ŋiri, ni e qa are ugeimeme. Mondor uge na ijo aŋgro sebiŋ a tulaŋ ugeugeiyoqnsiq jaqatiŋ koba yeqnu.” 23Onaqa Yesus a uŋa di aqa anjam qusiq quosaibulosiq anjam bei kamba minjosai. A mequmej. Deqa aqa aŋgro naŋgi aqa areq bosib minjeb, “O Tamo Koba, uŋa di a siŋgila na iga pailgoqnsiqa daurgeqnu. Deqa ni na saidyimqa a puluosim ulaŋqas.”

24Onaqa Yesus na kamba minjrej, “Israel naŋgi kaja bul mandor saiqoji. Deqa e naŋgi segi aqaryainjrqajqa Qotei na qariŋbonaq bem.” 25Onaqa uŋa di a Yesus aqa areq di siŋga pulutosiqa pailyosiq minjej, “O Tamo Koba, ni na e aqaryaibe.” 26Onaqa Yesus na kamba minjej, “Iga aŋgro du du naŋgo iŋgi yainjrsim olo bauŋ naŋgi anainjrqom di kumbra bolesai.” 27Onaqa uŋa dena olo Yesus minjej, “O Tamo Koba, ni kere maronum. Ariya e kamba anjam bei mermit ni que. Aŋgro du du naŋgi iŋgi uyeqnabqa iŋgi ñeŋgi ululoŋeqnaqa bauŋ naŋgi dego uyeqnub.” 28Onaqa Yesus a anjam di qusiqa minjej, “O uŋa, ni e qa ino areqalo tulaŋ siŋgilatonum deqa ni anjam degsi merbonum. Deqa ni gilime. Ino anjam di e na dauryosiy ino aŋgro boletqai.” Degsi minjnaqa bati qujai deqa mondor uge na aqa aŋgro di uratonaqa a boleej.

Yesus na tamo uŋgasari gargekoba naŋgi boletnjroqnej

29Onaqa Yesus a sawa di uratosiqa walwelosiq Galili ya aguq di brantej. Brantosiq dena manaq oqsiq dia awesoqnej. 30Awesonaqa tamo uŋgasari tulaŋ gargekoba naŋgi na tamo siŋga qandamnjro qaji ti tamo ŋam qandimnjro qaji ti tamo jejamu lainjro qaji ti tamo meŋ siŋgilainjro qaji ti tamo ma utru segi segi so qaji naŋgi ti joqsibqa Yesus aqa areq di ateleŋeqnabqa a na naŋgi kalil boletnjroqnej. 31Deqa tamo meŋ siŋgilainjro qaji naŋgi olo anjam bole maroqneb. Tamo jejamu lainjro qaji naŋgo jejamu olo siŋgilaoqnej. Tamo siŋga qandamnjro qaji naŋgi olo tigelosib walweloqneb. Tamo ŋam qandimnjro qaji naŋgi olo ŋam poinjreqnaqa sawa unoqneb. Onaqa tamo uŋgasari kalil naŋgi di unsibqa naŋgi are koba qaloqnsib Israel naŋgo Qotei aqa ñam soqtoqneb.

Yesus na tamo 4,000 naŋgi iŋgi anainjrej

32Onaqa Yesus na aqa aŋgro naŋgi olo metnjrnaqa aqa areq bonabqa minjrej, “Tamo uŋgasari naŋgi bati qalub e koba na soqneb naŋgi iŋgi saiqoji. Deqa e naŋgi qa are ugeibqo. E naŋgi mam ti suweinjritqa gamq dia naŋgi mam na lao uge.” 33Degsi minjrnaqa naŋgi na kamba minjeb, “Sawa endi wadau. Deqa iga iŋgi qabe na osimqa tamo uŋgasari gargekoba endego anainjronam kereqas?” 34Onaqa Yesus na minjrej, “Niŋgi bem gembub unu?” Onaqa minjeb, “Bem 7-pela unu. Qe kiñilala quja quja dego unu.”

35Onaqa Yesus na tamo uŋgasari naŋgi minjrej, “Niŋgi kalil mandamq di awoeleŋoiye.” 36Degsi minjrnaqa naŋgi kalil mandamq di awoonabqa Yesus na bem 7-pela ti qe ti di osiqa Qotei pailyosiqa bem ti qe ti giŋgeŋyosiqa aqa aŋgro naŋgi enjreqnaqa naŋgi na osi giloqnsibqa tamo uŋgasari naŋgi enjreqnab uyoqneb. 37Uynab kalil menetnjrej. Onaqa iŋgi oto urateleŋeb qaji di Yesus aqa aŋgro naŋgi na koroiyosib gumba kokba 7-pelaq di jignab maqeleŋej. 38Tamo kalil iŋgi uyeb qaji naŋgi sisiyeb 4,000. Ariya uŋgasari ti aŋgro du du ti naŋgi sisiyosai. 39Onaqa Yesus na tamo uŋgasari kalil naŋgi suweinjrnaqa naŋgo qure qureq gileqnabqa a qobuŋ gogetosiqa Magadan sawaq gilej.